SPAK përfundon hetimet për koncesionin e sterilizimit. Pritet t’i komunikohen akuzat të pandehurve, përfshirë ish-ministrit Ilir Beqaj dhe 8 personave të tjerë. Mësohet se SPAK po u komunikon akuzat personave të pandehur, ndërsa ish-ministrit të Shëndetësisë Ilir Beqajt do i komunikohet akuza të hënën.
Për koncesionin e Sterilizimit në pranga janë vënë 2 persona, ish zv/ministri Klodian Rjepaj dhe biznesmeni Ilir Rrapaj. Në hetim janë 8 persona të tjerë, mes tyre edhe ish-ministri i Shëndetësisë, Ilir Beqaj.
Lista e shkeljeve përmban një studim fizibiliteti me të dhëna të rreme në kundërshtim me ligjin; hartimi i kritereve në mënyrë të tillë që t’u përshtateshin gjendjes reale të kompanive të përzgjedhura paraprakisht si dhe mosveprimin e Beqajt për zgjidhjen e konfliktit të interesit mes Rrjepajt si kryetar i komisionit të koncesionit dhe Rrapajt si përfitues i tij.
Shkelje ligjore janë gjetur edhe gjatë negocimit të kontratës koncesionare, që sipas gjyqtarit kanë qenë “dukshëm në favor të kompanisë së shpallur fituese, në dëm të interesave të shtetit”. Pas hetimeve 3-vjeçare të kryera nga SPAK, emri i Beqajt mungoi fillimisht në listën e personave të akuzuar për shpërdorim detyre dhe mashtrim me pasoja të rënda, por në një vendim për masë sigurie, gjyqtari vlerësoi se shkeljet e akteve ligjore ngriheshin në nivelin e përgjegjësisë penale për Beqjen.