Ndriçimi në qytetin e Burrelit ka qenë një shqetësim i madh për banorët, të paktën deri para pak vitesh. Rrugët kryesore, sheshet, oborret e pallateve ishin në errësirë të plotë.
Tashmë situata është totalisht ndryshe. Është bërë kujdes jo vetëm në mjediset brenda qytetit, por bashkia ka investuar edhe në hyrje-daljet e qytetit, duke ndriçuar rrugët nacionale, madje edhe disa qendra administrative si dhe rrugë rurale.
Burime pranë Ndërmarrjes së Shërbimeve Bashkiake Mat pohuan për tirananews.al se janë vendosur vitet e fundit më shumë se 1500 ndriçues të rinj dhe afro 200 shtylla të reja në segmentet Ura e Matit-Burreli, Batër e Vogël-Burrel, qendrat administrative Komsi, Lis dhe në lagjet e qytetit Burrelit.
Mësohet sakaq se Bashkia Mat ka zëvendësuar të gjithë neonët e vjetër, duke montuar ndriçues ekonomikë, pra kursehet energji elektrike,
Aktualisht po punohet në segmentin Burreli-Ish Pularia, duke siguruar ndriçim të plotë të hyrje dhe dalje të qytetit verilindor.