Në katër komunat e banuara me shumicë serbe në pjesën veriore të Kosovës, Mitrovicë e Veriut, Zveçan, Zubin Potok dhe Leposaviq, po votohet për largimin e katër kryetarëve shqiptarë. Interesimi i qytetarëve për të votuar ishte minimal pasi pak ditë para votimit, Lista Serbe, ftoi për bojkot me arsyetimin se listat e votuesve “nuk e pasqyrojnë gjendjen reale në terren”, duke thënë se numri i shqiptarëve në listat e votuesve “ishte rritur”.
Në një intervistë për Euronews Albania, eksperti Arsim Sinani u shpreh se bojkotimi i serbëve në zgjedhje është lajm i keq për serbët por lajm i mirë për shqiptarët e Kosovës.
Sipas tij ajo që është e rëndësishme është se sovraniteti i Kosovës nuk mund të diskutohet më në Veri të Kosovës.
“Serbërt po e bojkotojnë votimin. Ky është një lajm i keq për serbët dhe lajm i mirë për kosovarët. Me gjasa do kemi vazhdimësi të kryetarëve të komunës deri në nëj zgjidhje tjetër. Kosova po i bën veprimet e duhura institucionale. Dalja e ulët tregon se Beogradi do të mbajë një situatë të tillë për shkak se ka pëduar mjaft humbje kohët e fundit në arenën ndërkombëtare.
Ajo që është e rëndësishme është se sovraniteti i Kosovës nuk mund të diskutohet më në Veri të Kosovës. Serbia kërkon ta mbajë të fragmentizuar Kosovën si një lloj kërcënimi dhe inati që ka Vuçiç. Perëndimi nuk po e kupton një gjë që ne me të madhe po ia themi, që duhet të demokratizohet Serbia fillimisht dhe pastaj të lirohet nga barra e madhe që e ka në Ballkan”-tha ai.