Një grua në moshë të thyer ka humbur jetën pasi u dërgua në spital dhe hetimi nxori se ajo vdiq për shkak të ujit të ndotur që vinte në çezmat e shtëpisë.
Ngjarja ndodhi në Magnezia, Greqi dhe viktimë është një grua 82 vjeçare, raporton noa.al duke cituar tv shtetëror ERT.
Sipas mediave vendase, bëhet fjalë për një 82-vjeçare, e cila u sëmur nga uji i ndotur dhe brenda pak orësh shfaqi simptoma të rënda të gastroenteritit, ndërsa kishte temperaturë të lartë.
Gruaja fatkeqe ka ndjekur mjekimin e rekomanduar nga mjekët e Qendrës Shëndetësore Velestino, por gjendja e saj shëndetësore është përkeqësuar dhe është transferuar në një klinikë në Volos, ku ka pësuar një atak kardiak, pas dobësimit total të trupit.
82-vjeçarja jetonte në Nea Aghialos por për shkak të problemeve shëndetësore javët e fundit ajo u zhvendos në shtëpinë e vajzës së saj në Stefanovikio. Vlen të theksohet se edhe vajza e të ndjerit është sëmurë me gastroenterit.
Ekspertët ndodhen në pikën e rezervuarit që furnizon rrjetin, për marrjen e mostrave të ujit dhe për analiza laboratorike, për të sqaruar dukurinë e shpërthimit të gastroenteritit në Magnezi.
Gjithashtu, sipas ERT, është bërë kontroll edhe në tre puset e ujësjellësit të dy fshatrave Rizomylos dhe Stefanovikiou, ku të premten e kaluar u zbuluan dhjetëra raste gastroenteriti.