Vahid Neziri, teksa punonte në galerinë e kromit 41 mbeti i plagosur rëndë. Vagonistin e zuri poshtë masivi i gurëve duke i shkaktuar plagë të rënda. Ai u transportua me helikopter në spitalin e Traumës në Tiranë.
Aksidentet në galeritë private të kromit janë të shpeshta në Bulqizë dhe institucionet duket se nuk ushtrojne kontrolle ndaj subjekteve minerare. Në një afat të shkurtër kohor kanë gjetur vdekjen dy minatorë në Bulqizë dhe Martanesh, të qarkut Dibër.
Shqetësimin për jetët e humbura dhe të plagosurit e ka ngritur deputetja demokrate Dhurata Cupi. “Ka shumë minatorë punojnë pa kushte, pa minimumin e garancisë, janë rreth 7000 minatorë ku drama e tyre përsëritet çdo ditë. Nuk ka transparencë, cilat janë kompanitë që i kanë licensat. Nuk ka asnjë informacion sa licensa janë dhënë, kush i ka marrë si shfrytëzohen”, u shpreh ajo.