Presidenti i Partisë së Lirisë, Ilir Meta reagoi sot për situatën e zjarreve në Shëngjin. Në një reagim në rrjetet sociale, Meta akuzoi qeverinë për papërgjegjshmëri në përballje me situatën.
“Shëngjini në tym dhe flakë nga papërgjegjshmëria dhe korrupsioni kriminal i Edi Ramës, që në kulmin e sezonit turistik e ka mendjen vetëm si të vjedhë zgjedhjet në Bashkinë e Himarës”, u shpreh ai, ndërsa ndau pamje nga situata e zjarreve në terren.
Ministria e Mbrojtjes lidhur me zjarrin që preku zonën e Shëngjinit, dha detaje mbi situatën, ku përveç forcave zjarrfikëse të pushtetit vendor është angazhuar për shuarjen e flakëve edhe helikopteri Cougar i Forcave të Armatosura, 40 mjete zjarrfikëse dhe 150 forca në terren.
Ministria e Mbrojtjes ka marrë masa masa në kohë për evakuimin e banorëve, duke bërë të mundur shmangien e rrezikut. Pas kërkesës drejtuar Mekanizmit Evropian të Mbrojtjes Civile pritet të mbërrijnë shumë shpejt dy avionë Canadair për ndërhyrje nga ajri.