Drejtori i CIA-s, William Burns zhvilloi këtë të martë një takim në Sarajevë me drejtorin e Agjencisë së Inteligjencës dhe Sigurisë së Bosnje Hercegovinës, Almir Xhuvo, dhe më pas shkoi në Presidencë ku zhvilloi takime me krerët e shtetit dhe ministrin e Jashtëm, Elmedin Konakoviç. Ai zbuloi disa detaje të bisedës me amerikanin, duke e cilësuar vizitën të rëndësishme.
“Ky është një konfirmim që SHBA i mban në krye të prioriteteve këto zona, veçanërisht Bosnjë-Hercegovinën. Kjo do të thotë shumë për stabilitetin e rajonit tonë. Ardhja e njeriut të parë të CIA-s është mesazhi më i qartë i administratës amerikane për të gjithë në rajon dhe në botë se administrata amerikane është shumë e pranishme”, tha Konakoviç për gazetën boshnjake “Avaz”.
Për drejtorin e CIA-s, ai tha se e njeh shumë mirë situatën. “Folëm për proceset në Bosnje Hercegovinë, rëndësinë e NATO-s dhe integrimit evropian, për atë që na shpejton dhe na ngadalëson, dhe në një pjesë kemi pasur edhe shkëmbime të informacioneve që nuk janë për publikun e gjerë. Mirëpo, është vetëm një konfirmim se administrata amerikane po merret seriozisht me Bosnje Hercegovinën, gjë që është shumë inkurajuese”, tha Konakoviç.