Ditën e sotme Silva Gunbardhi ishte e ftuar speciale në emisionin “Rudina”. Këngëtarja e njohur promovoi këngën e saj më të re “Baba”, e cila është një dedikim për babain e saj të ndjerë. I ati i Silvës nuk jeton prej 16 vitesh dhe këngëtarja ka treguar se vazhdon t’ja ndjejë ende mungesën. Këngëtarja ka ndarë me të gjithë edhe disa detaje nga jeta e saj gjatë kohës që jetonte me familjen. Ajo ka rrëfyer se jeta për ta nuk ka qenë e thjeshtë, sepse kanë pasur të ardhura mesatare. Silva ka treguar edhe një histori shumë prekëse nga koha kur babai i saj ishte sëmurë dhe i duhej të qëndronte gjithë kohën shtrirë.
Këngëtarja rrëfeu se njëherë kishte mbledhur para për të blerë një krevat, të cilin më pas ja dhuroi babait, sepse ai kishte probleme të shumta me shtyllën kurrizore. “Nuk më tha po në moment, por kur u vendos në krevat e lexova në sytë e tij sikur u lehtësua. Nuk do ta harroj kurrë vështrimin e tij. Ne kemi qenë një familje që hynim tek familjet e mesme nga ana ekonomike, nuk kishim shumë mundësi për të blerë gjëra”, ka treguar Silva.
