Ministri i Brendshëm, Ervin Hoxha, gjatë një takimi informal me gazetarët, ka prezantuar tre objektivat kryesore të tij si drejtues i Ministrisë, duke theksuar rëndësinë e përfshirjes së zonjave në pozita drejtuese në Policinë e Shtetit.
Hoxha vuri në dukje se mbyllja e procesit të gradave për më shumë se një dekadë ka qenë e padrejtë dhe ka ndikuar negativisht te një brez i tërë efektivësh në polici. Ai e konsideroi si një hap të rëndësishëm drejt diversifikimit dhe përmirësimit të lidershipit brenda strukturës.
Objektivat e Ministrit Hoxha janë:
- Smart City: Projekti i nisur nga ish-ministri Balla që synon mbulimin dixhital të vendit me kamera sigurie, sisteme të identifikimit të targave, dhe integrimin e inteligjencës artificiale në monitorimin e sigurisë.
- Ndryshimi i brezave në Polici përmes konkursit: Sipas ligjit të ri, do të ketë një konkurrim transparent dhe të hapur për pozitat drejtuese, duke përfshirë edhe testimin e aftësive të komunikimit me publikun.
- Krijimi i identitetit dixhital me IdentiTek: Ministri theksoi rëndësinë e kompanisë që do të mundësojë identifikimin dixhital të qytetarëve, duke pasur ID dhe pasaportën e tyre të aksesueshme përmes telefonit kur marrin shërbime publike.
Ministri Hoxha ftoi çdo efektiv të Policisë së Shtetit që përmbush kriteret e kërkuara të aplikojë në garën për drejtimin e policisë, duke theksuar se përzgjedhja do të bëhet nga Komisioni i Emërimit dhe jo me ndikimin e tij personal.