Vota e emigrantëve, ministri Balla-opozitës: Votoni aktin normativ që mundëson financimin e këtij hapi

Ministri i Shtetit për Marrëdhëniet me Parlamentit, Taulant Balla nga seanca plenare në Kuvend, i ka bërë thirrje opozitës që të votojë aktin normativ për t’i dhënë fondin që i duhet KQZ-së për ngritjen e një regjistri për mundësimin e votës së emigrantëve. ”Votimi i aktit normativ mundëson financimin e këtij hapi të rëndësishëm nga autoriteti i ngarkuar me ligj për organizimin e zgjedhjeve”, tha Balla. Ai tha se për krijimin e regjistrit, duhet që KQZ t’i propozojë rregullatorit, rregullatori me një shumicë të cilësuar do të përcaktojë procedurën mbi të cilën të ngrihet regjistri. Po ashtu Balla shtoi se shqiptarët e diasporës ata duhet të regjistrohen, ndërsa njoftoi se procesi i regjistrimit fillon 120 ditë para ditës së zgjedhjeve dhe mbyllet 60 ditë para ditës së zgjedhjeve.