Gëzim Topçiu është i vetmi politikan në Shqipëri që ka fituar 7 beteja zgjedhore lokale me logon e PS. Topçiu është sot në mandatin e 7 si kryetar i bashkisë së Maliqit dhe për emisionin “Vendi Im” nga Edlira Prendi, tregon se çfarë e ka ndihmuar atë të fitojë çdo palë zgjedhje prej vitit 2000.
“Unë kur kam filluar punë si kryetar bashkie në vitet 2000 kam ardhur me idenë që unë sa vite të rri do të punoj e kontribuoj që të le një emër. Dhe ky është çelësi, nuk është se unë jam ndryshe nga kryetarët e tjerë. Por jam munduar me dy elementë të kem një marrëdhënie sa më njerëzore me komunitetin që ështe e vështirë. Është e vështirë për shkak të sfidave të punës, ajo zyrë, ai institucion, të gjithë ata që vijnë aty kërkojnë; kanë një hall, një problem, kërkojnë një punë, kërkojnë diçka që u takon, kërkojnë diçka që nuk u takon por nuk të mirëkuptojnë. Kështu që është sfidë më vete. Dmth e para është marrëdhënia njerëzore dhe patjetër puna, mbajtja e premtimeve”, shpjegon kryebashkiaku Topçiu.
Por kryebashkiaku pranon se ka momente kur e ka menduar të tërhiqet. “Ka ngarkesë, patjetër ka ngarkesë. Ka momente në të cilat ndihesh edhe pesimist, për punë që nuk i bën dot. Ti mund të kesh qejf të madh për ta rehabilituar një punë, për të bërë një ujësjellës, për të bërë një rrugë, kush nuk ka qejf ti ketë të gjitha rrugët më asfalt, kryetari i bashkisë? Dhe në momentin që ti i shkon njëherë, i shkon dy herë dhe nuk ia mban një premtim, ndihesh shumë keq, të vjen rëndë dhe skuqesh ti vesh atij qytetari. Kështu që kjo është ajo që të lodh, që të mërzit dhe thua ore mos ka ardhur koha që ka të tjerë që mund ta bëjnë më mirë këte punë”,-rrëfen Topçiu për “Vendi Im”.
Sipas ligjit Gëzim Topçiu në fund të këtij mandati nuk mund të garojë më, por ai do të mbetet mesa duket i vetmi pushtetar lokal në Shqipëri që drejtoi një bashki për 27 vite.