Edhe pse nuk janë regjistruar në zgjedhjet e 30 qershorit, dy partitë më të mëdha në opozitë, duke pretenduar për shkelje të rënda me procesin zgjedhor kanë vendosur të regjistrojnë anëtarët e tyre në çdo KZAZ.
Sekretari për Çështjet Zgjedhore të PD-së, Ivi Kaso, dhe përfaqësuesi i LSI-së depozituan në KQZ emrat e tyre dhe do të jetë vendimi që KQZ do të marrë që do të zyrtarizojë këtë kërkesë të opozitës, raporton tirananews.al.
Por edhe pse në qëndrimin zyrtar të PD-së thuhet se roli I tyre do të jetë vetëm mbikqyrja, prania në KZAZ pritet që të jetë edhe një “lojë” për të bllokuar për në moment të fundit procesin zgjedhor.
Në pikën 8 të nenit 29 të Kodit Zgjedhor përcaktohet edhe se cfarë ndodh ditën e zgjedhjeve kur vendi i anëtararit apo sekretarit mbetet bosh. Sipas këtij neni, zëvendësimi duhet kryer brenda 3 orëve nga KQZ. Por një mospërmbushje e detyrës në momentin e fundit do e bënte të pamundur për KQZ-në që të bënte plotësimin e të gjitha KZAZ-ve me komisionerë. “Kur vendi i një anëtari ose sekretarit të KZAZ-së mbetet vakant në ditën e zgjedhjeve, propozimi në KQZ duhet të dorëzohet jo më vonë 3 orë nga çasti i krijimit të vakancës. Në rast se subjektet me të drejtë propozimi nuk propozojnë kandidaturë në KQZ, kjo e drejtë i kalon partive politike të të njëjtit grupim që vijnë pas tyre në Kuvend për nga numri i vendeve të fituara në Kuvend në zgjedhjet pararendëse. Nëse edhe këto parti nuk propozojnë anëtarë, KQZ-ja emëron kryesisht anëtarët e KZAZ-së deri në plotësimin e numrit të nevojshëm të anëtarëve për vendimmarrje”. Më shumë se formalizim KQZ do të duhet të verifikonte më parë edhe kandidaturat e tjera për anëtarë për të plotësuar vakancat në KZAZ.
Administrimi i Zgjedhjeve Zgjedhjet administrohen nga një sistem administrimi me tre nivele: Komisioni Qendror i Zgjedhjeve (KQZ), 90 Komisione të Zonave të Administrimit Zgjedhor (KZAZ), dhe 5,362 Komisione të Qendrave të Votimit (KQV). Votat do të numërohen nga Grupet e Numërimit (GN) në 90 Vende të Numërimit të Votave (VNV). Komisionet e zgjedhjeve në të gjitha nivelet kanë 7 anëtarë të emëruar nga shumica parlamentare dhe opozita.
Por edhe shkarkimi i tyre është pothuajse i pamundur pasi në asnjë rast nuk e parashikon nëse ata ikin në momentin e fundit. “Anëtarët dhe sekretari i KZAZ-së lirohen nga detyra me vendim të KQZ-së kur: a) kanë marrëdhënie krushqie të afërt ose gjinie deri në shkallë të katërt me ndonjërin nga kandidatët që konkurrojnë në zonë; b) janë në marrëdhënie pune me ndonjërin prej kandidatëve të përfshirë në listën shumemërore të një partie apo koalicioni që konkurron në zonë; c) nuk plotësojnë më kushtet për të qenë zgjedhës; ç) nuk kanë më vendbanimin e tyre në zonën zgjedhore; d) subjekti zgjedhor që i ka propozuar kërkon zëvendësimin e tyre”, thuhet në nenin 31 të Kodit Zgjedhor.
Nëse një taktikë e tillë do të ndiqet edhe për komisionerët e qendrave të votimit, do e bënte pothuajse të pamundur mbajtjen e zgjedhjeve atë ditë për shkak të masivizimit të problemit.
Partitë e opozitës, përmes drejtuesve të tyre politikë, janë shprehur se zgjedhje në 30 qershor nuk do të ketë. Marrja e drejtimit të gjysmës së Komisioneve Zonale të Administrimit Zgjedhor nga opozita dhe realizimi i një skenari të mundshëm për tërheqjen e tyre gjatë ditës së zgjedhjeve mund ta vendosë në pikëpyetje të gjithë procesin në 30 qershor. / tirananews.al