Ushtria izraelite vrau të paktën 39 palestinezë në sulmet në të gjithë Rripin e Gazës gjatë natës, thanë zyrtarë të shëndetësisë të enjten, duke përfshirë të paktën 20 persona në një sulm që dogji çadrat në një kamp refugjatësh të mbushur me njerëz.
Banorët mbanin një trup të mbështjellë me qilima nga rrënojat e djegura të strehimoreve të improvizuara në Mauasi, pranë bregdetit në perëndim të qytetit Khan Younis në Gazën jugore, ku dhjetëra mijëra njerëz janë strehuar për muaj të tërë. Izraeli e ka shpallur qytetin zonë humanitare dhe prej kohësh u ka thënë njerëzve që të shkojnë atje për sigurinë e tyre.
Të afërmit e viktimave thanë se sulmet e fundit tregojnë se një deklaratë e re nga grupi ndërkombëtar i të drejtave të njeriut Amnesty International, e cila akuzon Izraeli se po ushtron gjenocid në Gazë, që është hedhur poshtë me forcë nga Izraeli, është shumë e vonuar.
Në një raport të botuar të enjten, organizata e të drejtave të njeriut, thekson se veprimet e Izraelit nuk mund të justifikohen me sulmin e Hamasit më 7 tetor, 2023, që shkaktoi luftën në Gazë dhe as me praninë e militantëve në zonat e banuara me civilë. Amnesty International thotë se Shtetet e Bashkuara dhe aleatët e tjerë të Izraelit mund të jenë bashkëfajtorë në gjenocid dhe u bëri thirrje atyre të ndalin dërgesat e armatimit Izraelit. Izraeli dhe Shtete e Bashkuara kanë kundërshtuar me forcë akuzat ndaj Izraelit për ushtrim të gjenocidit në Rripin e Gazës.
Zyrtarë mjekësorë në Rripin e Gazës thanë se mes 20 viktimave të konfirmuara të sulmit izraelit kishte gra dhe fëmijë. Izraeli tha se sulmi kishte në shënjestër operativë të lartë të Hamasit, të cilët nuk i identifikoi.
Më vonë të enjten, Hussam Abu Safiya, drejtor i spitalit Kamal Adwan në Beit Lahiya në veri të Gazës, tha se një djalë 16-vjeçar që përdorte një karrige invalidi u vra dhe disa njerëz, përfshirë mjekë, u plagosën nga një sulm izraelit ndaj spitalit.
Deri më tani, mbi 44,500 persona llogaritet se janë vrarë gjatë fushatës ushtarake të Izraelit, sipas zyrtarëve shëndetësorë të Gazës, që nuk bëjnë dallimin ndërmjet civilëve dhe militantëve, por që thonë se mbi gjysma e viktimave janë gra dhe fëmijë.
Lufta filloi pas sulmit të Hamasit më 7 tetor të vitit 2023 ndaj vendbanimeve izraelite, duke vrarë 1,200 personave, shumica civilë. Grupi militant mori peng edhe rreth 250 persona, përfshirë fëmijë dhe të moshuar. Rreth 100 pengje ende po mbahen në Gazë dhe besohet se një e treta e tyre kanë vdekur.
Ofensiva e Izraelit është ndër fushatat më të përgjakshme dhe shkatërruese që nga Lufta e Dytë Botërore./VOA