Ministrja Albana Koçiu pa nga afër sot pajisjet mjekësore moderne që i janë shtuar laboratorit të Poliklinikës së Specialiteteve Nr. 3 në Tiranë dhuruar nga drejtori i Fondacionit “Fundjava Ndryshe”, Arbër Hajdari.
Koçiu theksoi se këto pajisje të teknologjisë së avancuar do të përmirësojnë ndjeshëm cilësinë dhe shpejtësinë e analizave laboratorike, duke mundësuar diagnostikime më të sakta dhe efikase për 280 mijë qytetarët që marrin shërbime në këtë qendër.
Ministrja deklaroi se “jemi duke punuar edhe për të shtrirë një plan mbështetje me aparatura të teknologjisë së lartë. Janë 100 milionë lekë nga buxheti i shtetit për vitin 2025 që do të pajisin jo vetëm Poliklinikën Qendrore, por edhe qendrat e tjera shëndetësore me fokus tek ato qendra që ushtrojnë veprimtarinë 24/7”.
Koçiu dha një tjetër lajm sa i përket Poliklinikës së Specialiteteve Nr. 3, duke bërë me dije se me buxhetin e vitit 2025 do t’i nënshtrohet rikonstruksionit.
Ndërsa drejtori i Fondacionit “Fundjava Ndryshe”, Arbër Hajdari u shpreh: “Kjo është një poliklinikë e cila i shërben afro 250 mijë qytetarëve dhe na vjen mirë që na jepet mundësia që t’u shërbejmë përmes këtij dhurimi.”