Partitë e vogla që nuk janë më krah Sali Berishës, po tentojnë që të krijojnë një alternativë. Lëvizja për Zhvillim Kombëtar dhe Djathtas 1912 paraqitën platformën. Dashamir Shehi dhe Enkelejd Alibeaj theksuan se demokracia ndodhet në një moment të rrezikshëm.
Alibeaj thotë se ka vend për Bashën me të cilin ndau rrugët. Për të ky koalicion opozitar do jetë i bazuar në 3 vlera thelbësore. Garimi me lista të hapura, mbështetja për drejtësinë dhe raporte të shëndetshme me partnerët ndërkombëtarë.
”Ka hapësirë për këdo, për Bashën, për deputetë të tjerë, figura publike, për lëvizje të tjera. Por të jemi të qartë, ky është një koalicion vlerash, nuk ia mohoj vlerat askujt, por do duhet të jemi të qartë kjo është një platformë që e pozicionin veten politikisht në opozitë me shumicën e sotme. Partitë e shumicës së sotme, të distancuar me subjekte apo parti të cilat kanë kontribuar me votë në mbylljen e listave, së dyti që gjatë gjithë kësaj kohe kanë delegjitimuar institucionet e drejtësisë dhe që kanë marrëdhënie të ngrirë me partnerët ndërkombëtar”, tha Alibeaj në Report Tv.
Për të Rama dhe Berisha janë bërë bashkë për të targetuar SPAK e GJKKO, por edhe për të ruajtur staus qounë e kryetarokracisë. Një koment e ka edhe për mosbindjen civile të PD, duke thënë se Berisha ka mbetur i rrethuar vetëm me mjeranë dhe këtë e tregon edhe pjesëmarrja në protesta.