Mes Ramush Haradinajt dhe Edi Ramës është shkëputur çdo lidhje pas akuzave të ndërsjellta në publik. Haradinaj e akuzoi Ramën se i kishte bërë presion në sy të Macron dhe Merkel për të hequr taksën, ndërsa Rama iu përgjigj publikisht duke e quajtur gënjeshtar dhe budalla.
“Për sa i përket komplotit për të copëtuar Kosovën apo për të krijuar një hartë të ri për botën, më kujton atë shprehjen që pa dalë Facebook-u, budallain e njihte vetëm shtëpia e vet, sot jetojmë në një botë që nga kjo pikëpamje është fatkeqe. Nëse do që gënjeshtrën tënde ta besojnë, bëje të pabesueshme, thotë një shprehje”, u shpreh Rama pak ditë më parë ndaj Haradinajt.
Linjat janë të qarta tashmë, Haradinaj është me Metën dhe Berishën, kurse Thaçi me Ramën. Madje vetëm dje, Meta sulmoi ashpër Thaçin dhe idenë e tij për shkëmbimin e territoreve me Serbinë edhe pse një fakt i tillë është mbështetur nga Rama.
Mirëpo, përtej të gjitha këtyre, Haradinaj e ka ftuar Ramën në inaugurimin e autostradës “Arbën Xhaferri” që lidh Kosovën me Maqedoninë.
Ceremonia do të mbahet më 29 maj. A do të shkojë kryeministri i Shqipërisë duke lënë pas gjithçka që ka ndodhur apo do të vijojë me idenë se Haradinaj është “budalla i pagdhendur”?