Shqipëria dhe Serbia janë vendet organizatore të Kampionatit Europian U-21 në vitit 2027. Pas konfirmimit nga UEFA, lajmin e ka bërë zyrtare dhe vetë Federata shqiptare e futbollit. Edhe pse në postimin e Federatës nuk përmendet në asnjë moment Serbia, si vend organizator, këto dy shtete janë vendosur nga qeveria e futbollit europian që do të mirëpresin këtë kompetcion kaq të rëndësishëm.
Turneu do të zhvillohet në qershor të vitit 2027 dhe do të përfshijë 16 skuadrat më të mira në Europë, mes tyre edhe lojtarë me emër që aktivizohen në ligat më të mira europiane. Stadiumet te të cilat do të zhvillohen ndeshjet e Europianit U-21 janë “Loro Boriçi” në Shkodër, “Arena Egnatia” në Rrogozhinë dhe ”Elbasan Arena” ndërsa Finalja e madhe, do të luhet në “Arenën Kombëtare” në Tiranë.
Si një vend pritës, edhe kombëtarja shqiptare e drejtuar nga Alban Bushi, do të ketë mundësi që për herë të parë të përfaqësohet në një turne madhor. Kur Shqipëria u kandidua si një vend organizator së bashku me Serbinë pati shumë polemika nga analistë, trajnerë apo dhe ish futbollistë të kombëtares. Disa e kanë konsideruar madje dhe si patericë e Serbisë që ka qenë vendi kryesor për të organizuar këtë kompeticion.