Ekipi Radio Sport Burreli ka shkëlqyer në Kampionatin e 9-të Kombëtar të Radio-Amatorizmit, duke u shpallur fitues i Kupës së Shqipërisë në disiplinën e Telegrafisë së Shpejtësisë së Lartë (HST) 2026. Një sukses që konfirmon edhe një herë përkushtimin, talentin dhe traditën fituese të sportistëve matjanë.
Një tjetër arritje e rëndësishme vjen për sportin matjan. Ekipi Radio Sport Burreli është shpallur kampion i Shqipërisë në Telegrafinë e Shpejtësisë së Lartë (HST) 2026, duke siguruar për të katërtin vit radhazi titullin kampion dhe Kupën e Shqipërisë në këtë disiplinë sportive.
Kampionati i 9-të Kombëtar i Radio-Amatorizmit, në disiplinën Telegrafia e Shpejtësisë së Lartë, u organizua nga Federata Shqiptare e Radio-Amatorizmit dhe u zhvillua në Fshatin e Paqes, në Shkodër, nga data 30 tetor deri më 2 nëntor 2026.
Në këtë aktivitet morën pjesë ekipet Radio Sport Burreli, RS Elbasani, RS Kruja dhe RS Vllaznia, si dhe sportistë nga Austria, duke i dhënë garës një karakter më të gjerë konkurrues.
Nën drejtimin e trajneres Zhulieta Hoti, e cila është njëkohësisht edhe pjesë aktive e skuadrës matjane, sportistët e Radio Sport Burrelit zhvilluan dy ditë gara intensive, duke treguar përgatitje, përqendrim dhe aftësi të larta në disiplinat e këtij sporti.
Pjesë e ekipit kampion ishin sportistët Glauk Gjini, Kloi Hani, Bleardo Lleshi, Desara Dani, Ergi Topalli, Aiden Leka, Eldorjan Marku, Ndoc Rica dhe Zhulieta Hoti.
Pas përfundimit të garave në disiplinat e marrjes dhe transmetimit, përfshirë ushtrimet me kodin Morse dhe garat e shpejtësisë, renditja e përgjithshme ekipore kurorëzoi RS Burrelin me vendin e parë dhe titullin kampion të Shqipërisë për vitin 2026.
Përveç suksesit në garën ekipore, sportistët e Burrelit arritën rezultate shumë të mira edhe në konkurrimin individual, ku secili prej tyre u vlerësua sipas kategorisë përkatëse. Këto rezultate dëshmojnë nivelin e përgatitjes së skuadrës dhe punën e vazhdueshme që po bëhet për zhvillimin e këtij sporti në Mat.
Pas këtij suksesi qëndron një punë e përbashkët dhe një kontribut i çmuar i disa personave. Krahas trajneres Zhulieta Hoti, një rol të rëndësishëm kanë dhënë edhe sekretarja organizative, Zenepe Dedja, mësueset Rukije Dalliu, Rruzhdije Ukaj, Nertila Laçi dhe Neva Gjini, si dhe prindërit, të cilët kanë qenë vazhdimisht pranë sportistëve gjatë përgatitjeve dhe garave.
Fitimi i Kupës së Shqipërisë për të katërtin vit radhazi është një dëshmi e vazhdimësisë së rezultateve të larta të Radio Sport Burrelit dhe një tjetër arsye krenarie për Matin.
Sportistët, trajnerja dhe të gjithë kontribuuesit shpresojnë që ky sukses të shërbejë si motivim për të arritur rezultate edhe më të larta në kampionatet e ardhshme kombëtare dhe ndërkombëtare, duke vijuar të përfaqësojnë me dinjitet Burrelin dhe Matin.
