Në orën 19:00 në të gjithë Kosovën nisi mbyllja e vendvotimeve për zgjedhjet parlamentare. Menjëherë pas përfundimit të procesit, ka nisur numërimi i votave të hedhura nga qytetërët.
Sipas KQZ, nga procesimi i mbi 90% të qendrave të votimit, pjesëmarrja rezulton 40.04% (nuk përfshihet vota e diasporës).
Në garë janë 28 subjekte politike, ndërsa katër janë kandidatët për kryeministër: Albin Kurti nga LVV-ja, Bedri Hamza nga PDK-ja, Lumir Abdixhiku nga LDK-ja dhe Ramush Haradinaj nga koalicioni AAK-Nisma dhe partnerët e tjerë.
Gjatë fushatës zgjedhore, katër kandidatët për kryeministër kanë folur për mundësinë e lidhjes së koalicioneve paszgjedhore. Disa prej tyre kanë mohuar mundësinë e koaliconit me partinë në pushtet; Lëvizja Vetëvendosje e të tjerë nuk e kanë përjashtuar mundësinë e koalicioneve.
Rezultatet e para zyrtare të zgjedhjeve parlamentare në Kosovë priten pas orës 21:00.
28 subjektet politike me 1.280 kandidatë, garojnë për të siguruar ulëse në parlamentin 120 vendesh të Kosovës.
Për herë të parë mediat e akredituara lejohen të vëzhgojnë procesin e numërimit të fletëvotimeve në vendvotime për zgjedhjet e Kuvendit të Kosovës.
Procesi zgjedhor ka filluar në orën 07:00 dhe ka përfunduar në orën 19:00. Sipas të dhënave të KQZ-së, numri i qytetarëve me të drejtë vote në vendvotime është 1 milion e 970 mijë e 944 votues.