Një lajm shumë pozitiv ka ardhur këtë javë për Bashkinë Belsh dhe biodiversitetin në Shqipëri. Në 84 liqenet karstike të kësaj zone është rritur jo vetëm numri i shpendëve ujorë, por edhe janë evidentuar specie të reja. Këto rezultate pozitive janë konfirmuar nga Censusi Ndërkombëtar i Shpendëve Ujorë për vitin 2025, i kryer edhe në Belsh nga Agjencia Kombëtare e Zonave të Mbrojtura për Qarkun e Elbasanit, në bashkëpunim me ekspertët ornitologë. Gjatë këtij monitorimi, specialistët kryen numërimin e shpendëve të pranishëm në liqenet karstike të Dumresë, zonë që tashmë po shndërrohet në një destinacion të rëndësishëm për vrojtimin e shpendëve dhe në një mundësi të artë për tërheqjen e turistëve të huaj.
Drejtori i Administratës Rajonale të Zonave të Mbrojtura në Elbasan, Fatmir Brazhda, thekson se, ndonëse në këtë rajon është vënë re një rënie e numrit të shpendëve dimërues për arsye të ndryshme, censusi ka identifikuar 18 lloje shpendësh dimërues ujorë. Sipas tij, në zonë dominojnë karabullakët, rosat e ndryshme, çafkat, kredharakët dhe pulëbardhat. Ndërkohë, në të gjithë Shqipërinë, sipas të dhënave të censusit të kryer në 34 pika të përcaktuara, janë numëruar 13 mijë individë më shumë krahasuar me vitin e kaluar. Shtimi i numrit të shpendëve ujorë dhe i specieve të reja, sidomos në liqenet karstike të Belshit, është një tregues i mirë i ruajtjes dhe zhvillimit të habitatit natyror. Ky census ka ndihmuar në vlerësimin më të mirë të pasurisë natyrore të Belshit dhe në hapjen e mundësive të reja për zhvillimin e turizmit.