Ekspertët ndahen në mendimin pro dhe kundër. Kjo nëse një zyrtar policie duhet të mbajë ose jo përgjegjësi penale, pasi në formular ka deklaruar se nuk ka përdorur aplikacione Sky Ecc. SPAK ka konfirmuar të kundërtën e thënieve të tyre. Eksperti Fatjon Softa thotë se deklarimi në formular ka qenë i rremë dhe duhet të hetohen edhe për kallëzim të rremë.
Eksperti Faik Basha, formularin e vetëdeklarimit e cilëson si një propagandë të ministrisë dhe se oficerët e policisë nuk mund të ndiqen penalisht për atë se çfarë kanë nënshkruar aty, pasi formulari nuk ishte i ligjshëm.
Basha thotë se policia dhe ministria nuk kanë asnjë kapacitet të vërtetojnë të kundërtën e thënieve të oficerëve. Ndërsa Softa propozon që efektivët e policisë duhet të ndjekin të njëjtin model si prokurorët e Spak që celularët e tyre të jenë të kontrollueshëm.