Ministri për Evropën dhe Punët e Jashtme, Igli Hasani mori pjesë sot në konferencën që u mbajt në Kolegjin e Evropës. Hasani e vuri theksin te rëndësia parësore që BE-ja duhet t’i kushtojë pranimit të anëtarëve të rinj.
“Kjo politikë strategjike e zgjerimit e BE-së mbetet instrumenti më i mirë gjeopolitik. Kjo në adresimin e kërcënimeve të sigurisë, paqartësive dhe sfidave ndaj paqes e stabilitetit. Ky diskutim është më aktual në një mjedis ndërkombëtar ku mbizotërojnë tensione dhe konkurrencë gjeopolitike në rritje”.
Hasani nënvizoi se Ballkani Perëndimor është i rëndësishëm për sigurinë e kontinentit evropian. “Argumenti ynë kryesor për integrimin në BE ka qenë të kthejmë Ballkanin Perëndimor nga “fuçi baruti” të Evropës në një ofrues sigurie. Pavarësisht progresit të ngadaltë të procesit të anëtarësimit në BE, rajoni ka bërë hapa të rëndësishëm përpara”.
Për sa i përket Shqipërisë, ai cilësoi se vendi e ka orientuar në mënyrë të pandalshme veten drejt integrimit Euro-Atlantik. “Pozita jonë strategjike në Ballkanin Perëndimor na bën një partner të vlefshëm për BE-në. Integrimi më i ngushtë me BE-në do të forcojë edhe më tej bashkëpunimin tonë në këto fusha, duke avancuar interesat tona të përbashkëta”.
Procesi i zgjerimit të BE u ofron shteteve si Shqipëria jo vetëm një rrugë për integrimin politik dhe ekonomik. Kjo për konsolidimin demokratik dhe transformimin shoqëror, ndërsa theksoi angazhimin e palëkundur të vendit tonë në rrugëtimin e tij evropian.
