Pas thuajse një jave stërvitore, më 28 maj do të publikohet lista nga trajneri i Kombëtares, Edi Reja, për dy ndeshjet e radhës kualifikuese, të cilat janë të parat për të në krye të Shqipërisë.
Më tej, pas qëndrimit për disa ditë në vendin tonë, më 2 qershor kuqezinjtë nisen drejt Frankfurtit, ku do të qëndrojnë deri më 6 qershor, ku paraditen e së enjtes do të fluturojnë drejt Rejkjavikut, dy ditë para ndeshjes kualifikuese.
Dy seanca stërvitore të programuara në Islandë për kuqezinjtë, dita e ndeshjes më 8 qershor në orën 15:00 (me orën tonë) dhe më pas rikthimi në vendin tonë për përballjen me Moldavinë më 11 qershor në orën 20:45.
“DEBUTIMI” – Pasi të kompletohen nga e hëna e në vijim, kuqezinjtë do të punojnë në kuadër të dy ndeshjeve kualifikuese. Edi Reja, para nisjes në Frankfurt më 1 qershor, ka vendosur që pasdite të kryejë edhe “debutimin” e tij me Shqipërinë.
Trajneri ka përcaktuar një ndeshje stërvitore përballë Kombëtares U-21 që drejtohet nga Alban Bushi. Ditën e shtunë, një ditë para nisjes drejt Gjermanisë, kuqezinjtë do të bëjnë një minindeshje përballë ekipit Shpresa.
Një sfidë stërvitore e cila do të shërbejë për të praktikuar skemat e punuara gjatë këtyre ditëve si dhe që tekniku të shohë në praktikë sjelljen e lojtarëve që do të ketë në dispozicion. Pasi do të punojë rreth katër ditë me lojtarët e planifikuar në listë, Edi Reja do të testojë përballë ekipit Shpresa edhe skemat taktike që pritet të përdorë në ndeshjet kualifikuese.