Shtëpia e yllit të Barcelonës dhe kombëtares spanjolle, Lamine Yamal, ka qenë objekt i një tentative grabitjeje në Esplugues de Llobregat, qytetin ku ai banon në Katalonjë.
Sipas të përditshmes “La Vanguardia”, hajdutët tentuan të hynin në banesë, por plani i tyre dështoi pasi rojet private të futbollistit konstatuan lëvizjet e dyshimta përmes kamerave të sigurisë, duke i detyruar autorët të largoheshin pa arritur të hynin në shtëpi.
Po në të njëjtën zonë, gjatë mëngjesit u raportuan edhe dy grabitje në banesa të tjera. Megjithatë, ende nuk është konfirmuar nëse autorët janë të njëjtët që tentuan të grabisnin shtëpinë e Yamal.
Pas incidentit, stafi i sigurisë së futbollistit bëri kallëzim në polici, e cila ka nisur hetimet për zbardhjen e ngjarjes. Dyshohet se objektivi i grabitësve ishte koleksioni i bizhuterive dhe orëve luksoze të 19-vjeçarit, por rrethanat e plota do të sqarohen nga hetimi.
Banesa e Lamine Yamal ka tërhequr vëmendjen edhe më herët, pasi në të kaluarën ka qenë rezidenca e ish-mbrojtësit të Barcelonës, Gerard Piqué, dhe këngëtares Shakira.