Ministri i Brendshëm, Ervin Hoxha thotë se qeveria shqiptare e ka në fokus sigurinë rrugore. Për të fuqizimi i Policisë përmes edhe teknologjisë bën një monitorim në të gjitha akset e vendit. Hoxha ndau rezultatet krahasuese të jetëve të humbura si pasojë e aksidenteve, mjet-individ nga viti 2012 e deri vitin e kaluar.
”Në vitin 2012 numri i jetëve të humbura ishte 334, në 2024 ishte 175 viktima në aksidente. Aksidentet me pasojë vdekjen mjet me këmbësor ku ne sot kemi rreth 35% të rasteve që përfshihen në këto aksidente, na detyron që të punojmë më shumë në këtë fushë”, shtoi ai.
Ministri nënvizoi faktin se çdo aksident i shmangur është një jetë e shpëtuar. Qeveria ka nënshkruar marrëveshjen e huamarrjes me Abu-Dabin që i hap rrugë një projekti ambicioz.
”Rrugët interurbane do të monitorohen nëpërmjet kamerave, shpejtësia do të matet nga radarët, por edhe targat do të jenë të lexuara nëpërmjet kësaj teknologjie. Siguria fillon nga sjellja jonë në trafikun rrugor. Misioni është ndërgjegjësimi për sigurinë në trafik përmes informimit, edukimit dhe frymëzimit, duke ndikuar në përmirësimin e kuadrit ligjor, zbatimit praktik dhe sjelljes në rrugë”,-tha më tej ministri Hoxha.