Kreu i SPAK, Altin Dumani u bë pjesë e takimit elektoral të kryeministrit Edi Rama në Dibër. Emri i tij u përmend si një burrë i kësaj zone. Sipas Ramës, kreu i SPAK u bë i fortë se PS me reformën në drejtësi, i dorëzoi në duar shpatën e ndëshkimit.
”Ju këtu në Dibër keni dhe drejtuesin e SPAK, e keni këtu. Po si u bë kaq i fortë Altin Dumani? Ne i dorëzuam drejtësisë shpatën e ndëshkimit që i takon drejtësisë”, tha Rama. Kryeministri nuk la pa vlerësuar figurën e tij, kjo duke u ndalur tek integriteti i tij dhe lufta e fortë me krimin.
“Altin Dumani ka qenë prokuror shumë vite, dhe po ky ka qenë nga Dibra, i ndershëm, i zoti, i papërzier veçse me punën e vet. Kishit dëgjuar ndonjëherë që Altin Dumani të merrte në pyetje ndonjë person të njohur?
Kur unë thosha atëherë që duam të kemi një drejtësi që të mos shohë majtas dhe djathtas, e kisha dhe për ne. Fuqia jonë morale, karakteriale, politike, qytetare është për të tejkaluar veten dhe për të qenë të aftë moralisht për të pranuar dhe goditjet e drejtësisë kur ato vijnë edhe brenda shtëpisë sonë”.