Edhe pse Shqipëria është në zi kombëtare, kjo nuk e ka ndaluar kreun e PD-së me aktivitetin. Sali Berisha ironizoi anëtaret gra të kabinetit qeveritar kur tha sillen si badigardet e ish-udhëheqësit të Libisë, Muammar Gaddaf të cilat i thurnin lavde udhëheqësit.
Gjatë fjalës së tij në konferencën “Global She: Voices of Power, Unity, and Change”, Berisha tha se ministret nuk kanë bërë asgjë në mbështetje të grave përgjatë 12 viteve të qeverisjes prej Ramës.
”U bë e famshme ajo që u thashë se ju silleni si badigardet e Gadafit, të cilat i thurnin lavdi Gadafit. Edhe ky një lloj mizogeni që nuk tregon dot 12 vite një program të veçantë për mbështetjen e grave dhe vajzave në Shqipëri. Nuk tregon një program për mbështetjen e nënave kryefamiljare të cilat janë të shumta sot”, tha Berisha.
Përgjatë tre mandateve në pushtet të socialistëve, Berisha tha se gratë u përballën me kushte të vështira jetese. ”Gratë shqiptare u përballën këto 12 vite me një varfëri në rritje. Në qoftë se në vendet e tregut të lirë, në ligjet e tregut, varfëria shkon në pakësim, në diktatura dhe narkodiktatura, varfëria ecën gjithnjë në rritje. Dhe kjo ndodhi këto 12 vite në Shqipëri”, tha Berisha.