AIDA në bashkëpunim me MEKI-n ju fton të bëheni pjesë e iniciativës që kombinon traditën me inovacionin për të ndërtuar ura të reja mes brezave. Në këtë event të veçantë do të mbledhim mjeshtëritë dhe pasionin e artizanëve tanë. Me pjesëmarrjen e kryeministrit Edi Rama, Ministrit të Ekonomisë Kulturës dhe Inovacionit, Blendi Gonxhja, artizanëve shqiptarë si dhe partnerëve dhe mbështetësve të këtij sektori.
Ky event ka për qëllim, jo vetëm promovimin, por ndërveprimin me target grupe të interesuara për produktet e tyre duke menduar zhvillimin e këtij zanati. Përmes takimeve, workoshope-ve, ekspozitorët e ZAN’ART do të kenë mundësinë të prezantojnë produktet dhe bizneset e tyre përballë një audience të përzgjedhur si hoteleri-turizem, agroturizëm dhe target grupe të interesuara për sektorin e artizanatit duke i mundësuar zgjerimin e tregjeve. Nga ana tjetër organizimi i tavolinave të diskutimit me aktorë të sektorit dhe institucioneve shtetërore do të adresojë sfidat e artizanatit në Shqipëri dhe planet strategjike. Një mundësi unike promovimi, ndërveprimi dhe diskutimi.
MISIONI
“Zan’Art” synon të krijojë një urë të gjallë ndërmjet brezave, duke i rikthyer artizanatit shqiptar vendin që meriton në shoqëri jo thjesht si mjeshtëri, por si një formë e gjallë e trashëgimisë kulturore. Ky event do të shërbejë si një piedestal për duar-artët, ata që me pasion dhe durim ruajnë dhe përcjellin vlerat tona kombëtare. Çdo qepje, gdhendje, thurrje apo ngjyrosje mbart një histori – një frymë të hershme që flet për identitetin tonë, për rrënjët dhe shpirtin e këtij vendi.
TARGET GROUP
Pjesëmarrja e 40 ekspozitorëve në ZAN’ART paraqet një mundësi të shkëlqyer për zhvillimin e zanateve të trashëguara brez pas brezi dhe është një thirrje për ta vlerësuar të bukurën e krijuar me dorë. Në këtë ngjarje të rëndësishme do të bashkohen mbi 200 persona pjesëmarrës duke filluar nga artizanët shqiptarë, bashkitë e qyteteve të ndryshme, institucionet kulturore (si:Muzeu, Akademia e Arteve etj), bizneset artizane, tregtarët e produkteve të artizanatit, partnerët dhe mbështetësit e këtij sektori, si dhe institucionet mbështetëse, si dhomat e tregtisë, ambasadat, dhe organizatat zhvillimore.
REZULTATET QË SYNOJMË TË ARRIJMË
- Promovimi i artizanatit shqiptar dhe mjeshtrisë tradicionale që përfaqëson identitetin tonë kulturor.
- Nxitja e ruajtjes dhe zhvillimit të zanateve të trashëguara brez pas brezi.
- Pasurimi i ofertës turistike të Shqipërisë duke ofruar produkte autentike dhe eksperienca unike për vizitorët.
- Rritja e ndërgjegjësimit mbi rëndësinë kulturore dhe ekonomike të artizanatit.
- Shtimi i kërkesës për produktet artizanale në tregun vendas dhe atë ndërkombëtar.