Drejtuesi politik i PS-së në Vlorë, Bledi Çuçi zhvilloi një takim elektoral me banorë të lagjes ”Çole”. Bashkë me kandidaten për deputete, Zamira Sinaj dhe kryebashkiakun Ermal Dredha, ata kërkuan mbështetjen me votë për PS-në dhe Edi Ramën në zgjedhjet e 11 majit.
Banorët e kësaj lagje deri në zgjedhjet e vitit 2021 kanë votuar përgjithësisht partitë e djathta. Për Çuçin kësaj radhe është ndryshe sepse e kanë kuptuar shumë mirë cila është forca që do të vijojë të qeverisë Shqipërinë në 4 vitet e ardhshme dhe do ta çojë vendin në BE.
”Tashmë nuk ka më majtas dhe djathtas, por ka përpara dhe mbrapa. Ju nuk do të zhgënjeheni kurrë që do të përqafoni në 11 maj Partinë Socialiste. Garanci për këtë është ekipi ynë, garanci për këtë është qeverisja socialiste, garanci për këtë është Edi Rama, kryeministri që i ka ndërruar faqen Shqipërisë dhe sidomos Vlorës. S’ka kartolinë më të bukur për të dëshmuar transformimin e Shqipërisë sesa transformimi i Vlorës”, tha Çuçi.
Më pas u takua edhe me pjesëtarë të Komiteteti i Veteranëve të Vlorës. ”Briseida Çakërri jo vetëm një vajzë e lindur socialiste, siç e kam thënë shpesh prej fillimit të këtij rrugëtimi drejt 11 majit, por tashmë ka edhe titullin “Pasardhës Veterani”, vlerësuar nga Komiteteti i Veteranëve të Vlorës. Kënaqësi të zhvillonim një takim së bashku, të evokonim vlerat e LANÇ, si dhe të ndanim domosdoshmërinë e bashkimit të madh që na duhet për fitoren e PS, për Vlorën 2030 dhe Shqipërinë në BE”,-tha Çuçi.