Nga Hasan PASHA*
Komentet për zgjedhjet politike të vitit 2025 kanë shpërthyer kudo. Ata që dolën humbës kanë rikthyer një retorikë tashmë të njohur – me akuza për “banditë e kriminelë”, “të korruptuar” apo “blerje e shitje votash”. Ndërkohë, pala fituese është treguar më e përmbajtur, më e qetë dhe më e qytetëruar.
Gjatë gjithë fushatës, socialistët kanë argumentuar se Shqipëria meriton të jetë pjesë e Bashkimit Europian, se Edi Rama është lideri më i suksesshëm i periudhës post-’90 dhe se Partia Socialiste është sot forca më e organizuar politike në vend, duke merituar plotësisht mandatin e katërt.
Fushata e të majtës u shqua si model në çdo aspekt. Nuk pati incidente, nuk u përdorën mjetet shtetërore për fushatë – ndryshe nga ç’ndodhte dikur me kundërshtarët tanë. Asnjë mësues, infermier apo punonjës i administratës nuk u vu nën presion për bindjet politike.
Edhe këtë herë, opozita nuk e meritoi fitoren. Në rajonin tonë, ajo u shfaq agresive ndaj qytetarëve, ndaj investimeve dhe ndaj punës së mirë të qeverisë dhe pushtetit vendor. Kandidatët e emëruar pa rrënjë në terren, më shumë ngjanin si kameramanë që “ngushëllonin” qytetarët pas 30 vitesh. Lëvizjet e tyre me karvanë makinash në fshatra dhe qytete sollën vetëm tension, ndasi e rrëmujë. Metodat e vjetra e të tejkaluara u rikthyen, duke krijuar kaos dhe zhurmë.
Në këtë kontekst, fitorja e Partisë Socialiste është edhe një fitore për demokratët e ndershëm – shumë prej të cilëve iu bashkuan kësaj rruge progresiste. Sepse sot, më shumë se kurrë, qytetarët kërkojnë qetësi, rregull e punë.
Pas këtyre zgjedhjeve, Shqipëria hyn në një fazë më të qëndrueshme, duke vazhduar me vendosmëri rrugëtimin e saj drejt Bashkimit Europian. Fitorja historike e së majtës në Qarkun e Dibrës, pas 34 vitesh, pritet të marrë një vlerësim të veçantë nga Qeveria Rama – pasi ky rajon vendosi t’i bashkohej kampit të fituesve progresistë.
-Kryetar i PS Mat