Kryeministri Albin Kurti, thotë se zgjidhja për të dalë nga ngërçi në Kuvendin e Kosovës është votimi i fshehtë. Kurti mbrojti kandidaturën e Albulena Haxhiut.
”Albulena Haxhiu nuk është as në pyetje, as në pikëpyetje. Përgjigja është votimi i fshehtë, për çfarë opozita padrejtësisht po e pamundëson kuorumin”, tha kryeministri në një prononcim të shkurtër për gazetarët të hënën.
Të dielën, deputetët dështuan për herë të 21-të radhazi të konstituojnë legjislaturën e nëntë parlamentare, të dalë nga zgjedhjet e 9 shkurtit. Dështimi për të konstituuar Kuvendin e ri ka zhytur vendin në një ngërç politik, duke e lënë atë edhe pa qeveri të re kur kanë kaluar më shumë se tre muaj nga mbajtja e zgjedhjeve.
Seanca u ndërpre dhe vazhdimi do të bëhet më 27 maj në orën 11:00. Pro votimit të komisionit për votim të fshehtë të kryeparlamentarit votuan 53 deputetë, dhe një votë kundër dhe asnjë abstenim. Në sallën plenare kanë qenë të pranishëm 90 deputetë.