Nuk do të ketë seance plenare të enjten. Seanca është shtyrë për të hënën më 16 qershor, me kërkesë të mazhorancës. Shkak është mungesa e kryeparpamentares Elisa Spiropali, e cila do të jetë të enjten në Ukrainë. Ky vendim është shoqëruar me debate në mbledhjen e konferencës së kryetarëve. Kreu i grupit parlamentar i PD-së, Gazment Bardhi është shprehur se nuk ka asnjë arsye për të shtyrë seancën, ndërsa i kujton kryeparlamentares se Kuvendi nuk është pronë e saj.
”Ti rruga e mbarë për atje ku do te jesh në datën 12. I ke dhënë zgjidhje problemeve në Shqipëri shko e zgjidh konfliktin në Ukrainë. Nuk ka asnjë arsye për të shtyrë seancën e Kuvendit. S’ka asnjë arsye te shtyhet seancën nga data 12 për në datën 16, sepse kjo është miratuar nga Konferenca e Kryetarëve. Kuvendi nuk është pronë dhe plaçkë e juaj siç keni tentuar ta trajtoni në kohët e fundit”, u shpreh Bardhi.
Jorida Tabaku, kritika të forta ndaj Elisa Spiropalit. “Do të doja të ngreja një shqetësim në lidhje me një deklaratë tuajën të para disa ditëve për çështjet e integrimit. Gjuha juaj ishte përçarëse dhe përçmuese ndaj kundërshtarit. Foltorja e Kuvendit nuk mund të përdoret për një gjuhë të tillë.
Kjo nuk është gjuha që kërkon procesi i integrimit. Më vjen keq ta them, por që kur ju keni marrë drejtimin e Kuvendit, kemi bërë hapa pas në Këshillin Kombëtar të Integrimit, në Komisionin e Posaçëm, dhe më pas edhe në procesin zgjedhor. Nuk i keni kryer detyrat që ju takojnë. Zgjedhjet janë kriteri dhe kushti i parë në të gjitha raportet dhe detyrat që kërkohen për procesin e integrimit dhe ky kriter u shkel në zgjedhjet e fundit”.