Ilir Alimehmeti thotë se Kodi Zgjedhor duhet hedhur në plehra. Ai kandidoi në zgjedhjet e 11 Majit, në listën e hapur të qarkut Tiranë dhe ishte në një garë të ngushtë me Jorida Tabakun, por mandatin e fitoi kjo e fundit. Alimehmeti theksoi se rinumërimi i votave në Tiranë është një precedent pozitiv. Ai shtoi se Sali Berisha e ka mbështetur në iniciativën e tij për transparencë.
”Ende nuk dimë të numërojmë votat. Rinumërimi do të ndodhë. Tani janë një sërë procedurash, që duhet të na bëhen me dije. Është precedent pozitiv. Ngel në klasë njëherë dhe hyn sërish në test dhe shpresojmë që KQZ të marrë një notë pozitive.
Është e drejtë e madhe që të kërkohet transparencë e madhe për mënyrën sesi janë bërë zgjedhjet. Berisha na ka mbështetur. Fëmijëve tanë duhet t’ju lëmë trashëgimi zgjedhje të lira e të ndershme. Ky Kod Zgjedhor duhet hedhur në plehra. Gara të jetë mes partive dhe jo kandidatëve të së njëjtës parti politike”,-tha në ”News 24”.