Tjetër incident ajror në Shtetet e Bashkuara. Pasagjerët e një avioni të kompanisë American Airlines u evakuuan në Aeroportin Ndërkombëtar të Denverit pasi rrota kryesore u përfshi nga flakët.
Aeroplani i modelit Boeing 737 MAX8, që fluturonte nga Denveri për në Miami, ishte gati për t’u ngritur në fluturim kur u pikas problemi me njërën nga rrotat e majta të ingranazhit kryesor të uljes. Rrota u përfshi menjëherë nga flakët dhe lëshoi tym të zi.
Pasagjerët në bord thanë se dëgjuan një shpërthim të fortë dhe më pas panë njërën prej rrotave të shkëputej nga avioni pak para se të fillonte evakuimi.
Pilotët ndërprenë menjëherë ngritjen dhe ekuipazhi i kabinës nisi me urgjencë evakuimin. Të gjithë 173 pasagjerët dhe gjashtë anëtarët e ekuipazhit u evakuuan në mënyrë të sigurt dhe janë në gjendje të mirë shëndetësore.
American Airlines lëshoi një deklaratë që konfirmoi problemin mekanik dhe shtoi se avioni është hequr nga shërbimi për inspektim. Pasagjerëve iu rezervua një fluturim zëvendësues për në Miami.