Për dy ditë nis dhe fushata elektorale për zgjedhjet e 30 qershorit, dhe kryebashkiaku Erion Veliaj, i cili kërkon mandatin e dytë në kryeqytet thekson se bashkia do të ruajë vigjilencën për garantimin e ligjshmërisë ne menaxhimin e territorit gjatë periudhës së fushatës.
“Nëse dikush mendon se meqë unë javën tjetër filloj fushatën nuk do e kem mendjen tek ndërtimet pa leje në qytet, gabohet shumë rëndë. Do të jemi akoma më të ashpër në fushatë, për të treguar se nuk bëjmë kompromis me asnjë votë për një të babëzitur, për një grykës. Mund të jetë ish-deputet, mund të jetë njeri me pushtet, mund të jetë laci i lagjes, mund të jetë një i fortë, mund të jetë një gangster, nuk më intereson hiç! Fushatës do t’i kushtoj të gjithë vëmendjen e rëndësishme, por nuk do lë mangët asnjë gjë të qytetit. Po kush mendon se muaji i fushatës është muaji i rrumpallës dhe për një grusht votash unë do të toleroj dikë që kërkon t’i hipë Vojo Kushit sipër, si ai tankut, e ka shumë gabim”, tha Veliaj.
Ai bëri këtë deklaratë në njësinë nr. 11 ku bashkë me kompaninë ALEAT hapën zyrat e reja të aplikimit për karta dhe pasaporta.