Katër vite pas miratimit nga Këshilli Bashkiak i Mirditës të vendimit për emërtimin e Pallatit të Kulturës “Gjok Beci” dhe të Sallës së Koncerteve “Fran Vorfi”, autoritetet vendore vazhdojnë të mos e zbatojnë këtë akt zyrtar.
Vendimi i datës 24 nëntor 2021, i konfirmuar edhe nga Prefekti i Qarkut Lezhë, mbetet sot i parealizuar në terren, një skandal që ngre pikëpyetje të mëdha mbi respektimin e ligjit dhe respektimin e vlerave kulturore në këtë bashki. Sipas Ligjit nr. 139/2015 për vetëqeverisjen vendore, çdo vendim i miratuar nga këshilli bashkiak, pas konfirmimit nga prefekti, është detyrimisht i zbatueshëm nga organet ekzekutive lokale.
Mosrespektimi i këtij detyrimi përbën shkelje të hapur të ligjit dhe kompetencave të pushtetit vendor, si dhe dëmton seriozisht një simbol kulturor të rëndësishëm për identitetin mirditor dhe shqiptar. Gjok Beci, një nga figurat më të shquara të letërsisë shqipe dhe përfaqësues i denjë i frymës artistike të veriut, meritonte më shumë se një vendim të lënë në harresë. Emri i tij përfaqëson një trashëgimi që tejkalon kohën dhe kufijtë lokalë. Juristë dhe aktivistë të shoqërisë civile kërkojnë tani ndërhyrje të menjëhershme institucionale.
Një prej rrugëve ligjore është vendimi i Prefektit për të kërkuar zbatim e ligjit, ose nisja e një padie në Gjykatën Administrative për moszbatim të një akti zyrtar. Emërtimi i një institucioni kulturor me emrin e një figure kombëtare nuk është një çështje administrative, është një akt memorieje dhe respekti që historia nuk duhet ta harrojë.
