2 javë para se deputetëve tu mbarojë mandati, Komisioni i Integrimit mblidhet për të miratuar pozicionin negociues të qeverisë shqiptare për grupkapitullin e fundit të negociatave për anëtarësimin në BE që lidhet me sektorin e bujqësisë.
Në mbledhje marrin pjesë vetëm përfaqësuesit e PS, pasi opozita e bojkotoi.
Kryetarja e Komisionit të Integrimit Jorida Tabaku sqaroi se mbledhja e komisionit është antikushtetues ndaj PD nuk merr pjesë.
“I sqarova qeverisë që mbledhja e komisionit jashtë sesioni është antikushtetues. Për një javë fillon sesioni ri parlamentar dhe opozita e ka prioritet procesin e integrimit dhe do të bëjë çdo gjë në dorë të saj ashtu si ka bërë në çdo rast për këtë proces! Ofrova disa zgjidhje praktike si mund ta kalonim këtë ngërc por qeveria vazhdoi në mënyrë të njënashme! Asnjë nga deputetët që sot kanë thirrur mbledhje nuk janë të rizgjedhur dhe nuk e kanë legjitimitetin të thërrasin mbledhje jashtë sesioni”, sqaroi Jorida Tabaku.