Kapiteneria e Portit Sarandë ka lëshuar një njoftim lidhur me përkeqësimin e kushteve të motit që kanë sjellë erë të fortë, duke bërë që të marrë masa të menjëhershme për garantimin e sigurisë në det.
Përmes një njoftimi zyrtar, autoriteti portual ka urdhëruar ndalimin e çdo daljeje në det për mjetet lundruese, përfshirë ato turistike, peshkarexhat dhe skafet e vogla, në zonat e Sarandës, Ksamilit dhe Borshit. Vendimi hyn në fuqi më 30 gusht 2025, që prej orës 06:00 të mëngjesit, dhe do të mbetet në fuqi deri në përmirësimin e kushteve dhe një njoftim të dytë.
“Për shkak të përkeqësimit të kushteve atmosferike dhe detare, përfshirë erërat me intensitet të lartë dhe dallgëzimin përtej normave të lejuara për lundrim të sigurt, ndalohet çdo dalje në det e mjeteve lundruese, përfshirë mjetet turistike, peshkarexhat dhe skafet e vogla, në të gjithë gjirin dhe zonën bregdetare të Sarandës, Ksamilit dhe Borshit.
Ky ndalim hyn ne fuqi nga data 30/08/2025, ora 06:00, dhe do të qëndrojë aktiv deri në një përmirësim të kushteve detare dhe një njoftim të dytë zyrtar nga Kapiteneria e Portit Sarandë.
Kujtojmë të gjithë përdoruesit e mjeteve lundruese se mosrespektimi i këtij urdhëri përbën shkelje ligjore dhe do të penalizohet sipas legjislacionit në fuqi”, thuhet në njoftim.