Është ndarë sot nga jeta këngëtari i serenatave korçare Astrit Koçibelli.
Lajmin e hidhur e ka bërë me dije Qendra e Artit dhe Kulturës Korçë përmes një postimi në rrjetet sociale.
“Lamtumirë Astrit Koçibelli !
Korça humbi sot një nga serenatistët e saj më të dashur. Me zërin dhe shpirtin e tij, Astriti u bë pjesë e historisë së serenatës korçare.
Këngët e tij do të vazhdojnë të jetojnë si kujtim i gjallë i dashurisë dhe artit të qytetit tonë”, shkruhet në postim.
Gjatë viteve të karrierës së tij, Koçibelli kontribuoi në ruajtjen dhe promovimin e traditës muzikore korçare, duke u bërë një figurë kyçe për brezat e rinj të artistëve që dëshirojnë të mbajnë gjallë këtë trashëgimi.