Presidenti i Ukrainës, Volodymyr Zelensky, zhvilloi një takim të rëndësishëm me kryeministrin sllovak Robert Fico në qytetin Uzhhorod, në Ukrainën Perëndimore. Takimi, të cilin Zelensky e përshkroi si “thelbësor”, u përqendrua në çështje si lufta në Ukrainë, garancitë e sigurisë dhe energjia.
“Është e rëndësishme të kemi këtë dialog. Ne do ta vazhdojmë atë,” – u shpreh Zelensky, sipas agjencisë ukrainase të lajmeve Ukrinform.
Nga ana e tij, Fico theksoi se marrëdhëniet mes Sllovakisë dhe Ukrainës janë të forta, pavarësisht dallimeve në qëndrime, dhe shtoi se shpreson që Ukraina të arrijë së shpejti garanci sigurie dhe një paqe të drejtë në konfliktin me Rusinë.
Fico nënvizoi se sulmet ukrainase ndaj infrastrukturës energjetike të Rusisë, si tubacioni Druzhba, kanë ndikuar negativisht edhe tek Sllovakia, e cila varet nga furnizimi me naftë ruse.
Takimi mes dy liderëve vjen pak ditë pas vizitës së Robert Fico-s në Kinë, ku u takua me presidentin rus Vladimir Putin.
Kryeministri sllovak deklaroi se Sllovakia dëshiron të normalizojë marrëdhëniet me Moskën, ndërsa në bisedimet me Zelenskyn ka përmendur edhe kontaktet me presidentin amerikan Donald Trump.