Ambasadorët shqiptarë të akredituar nëpër botë, do të mblidhen në Tiranë gjatë 3 ditëve të ardhshme, për të marrë pjesë në konferencën vjetore Diplo2025 ku do të diskutohen sfidat diplomatike dhe angazhimin e Shqipërisë për anëtarësimin drejt Bashkimit Europian.
Me titull “Shqipëria 2030 në Evropë, e ndërlidhur me botën”, konferenca do të zhvillohet në formën e paneleve me pjesëmarrjen e ekspertëve vendas dhe ndërkombëtarë në mjediset e Bankës së Shqipërisë (ish-hotel Dajti).
Diskutimet do të fokusohen në integrimin evropian të Shqipërisë dhe të rajonit, diplomacinë ekonomike, si edhe në çështjet e sigurisë rajonale e globale.
Ky është një pikëtakim i rëndësishëm i shërbimit të jashtëm për të përcaktuar prioritetet, për të adresuar sfidat kryesore dhe për të forcuar shërbimin konsullor për qytetarët shqiptarë.