Jo vetëm qeveria ”Rama 4” u mësua sot, por edhe sesi do të jetë Partia Demokratike në Kuvend. Kryetari i PD-së, Sali Berisha zhvilloi një takim me grupin e ri parlamentar të Partisë Demokratike, ku tha se mosparaqitja në Kuvend e opozitës nuk është alternativa e duhur për të bërë opozitarizëm.
Grupi i PD-së do të vijojë të drejtohet nga Gazment Bardhi. Nëkryetar grupi, Belind Këlliçi dhe Tomorr Alizoti. Berisha propozon sërish nënkryetar Kuvendi, Agron Gjekmarkajn. Sekretare e grupit parlamentar zgjidhet Elda Hoti, ndërsa zëdhënëse Ledina Alolli. I vetmi që votoi kundër propozimeve të Berishës ishte Bujar Leskaj.
Ai nuk la pa komentuar as deklaratën e kryeministrit Edi Rama sot, ku shpalli kabinetin e ri qeveritar dhe një sërë vendimesh. “Sot ishte një ditë zie e vërtetë për shqiptarët. Sot, kreu i narkoshtetit, në një fjalim që tani përveç Maduros, nuk e mban kush aq të gjatë, u tha shqiptarëve mesazhet më të zeza”,-tha Berisha.