Jemi shumë pranë arritjes së paqes! Janë fjalët e presidentit amerikan Trump pasi grupi militant që udhëheq Gazën tha se pranonte pjesë kyçe të planit të paqes, përfshirë lirimin e të gjitha pengjeve. Kreu i Shtëpisë së Bardhë falënderoi Katarin, Turqinë, Arabinë Saudite, Jordaninë dhe Egjiptin për përpjekjet e bëra në negocimin e ujdisë.
“Kjo është një ditë e madhe, do të shohim se si do të shkojë gjithçka. Duhet të presim fjalën e fundit dhe ta konkretizojmë. Më e rëndësishmja është që mezi pres që pengjet të kthehen në shtëpi tek të afërmit e tyre Fatkeqësisht, ju e dini gjendjen në të cilën ndodhen. Pra, dua t’ju njoftoj se kjo është një ditë shumë e veçantë, ndoshta e pashembullt në shumë mënyra. Por ju falënderoj të gjithëve dhe falënderoj të gjithë ata vende të mëdha që ndihmuan. Na u dha një ndihmë e jashtëzakonshme. Të gjithë ishin të bashkuar në dëshirën që kjo luftë të mbaronte dhe të shpëtohej paqja në Lindjen e Mesme. Dhe jemi shumë afër arritjes së kësaj”, deklaroi Trump.
Pasi presidenti amerikan i dha ultimatum grupit militant të pranonte planin e propozuar prej tij deri të dielën në orën 6:00, Hamas u përgjigj se pranonte pjesë kyçe të tij, përshirë fundin e luftës, tërheqjen e Izraelit dhe lirimin e pengjeve. Por ai kërkoi negociata të mëtejshme, lidhur me çarmatosjen e grupit dhe rolin në qeverinë e ardhshme të Gazës.
Më vonë, edhe Xhihadi Islamik, që gjithashtu mban disa prej pengjeve izraelite, e mbështeti qëndrimin e aleatit të tij, Hamas, një lëvizje kjo që mund ti hap rrugën lirimit të të gjithe shtetasve izraelitë të mbajtur peng. Zyra e Netanjahut tha më herët gjatë së shtunës së Izraelit po përgatitej për një implementim të menjëhershëm për fazën e parë të planit të Trump për Gazën për lirimin e pengjeve, pas përgjigjes së Hamas.