Pasi Sali Berisha e theksoi gjatë konferencës për shtyp, Partia Demokratike ka njoftuar nisjen e procedurave parlamentare për shkarkimin nga detyra të Presidentit të Republikës, Bajram Begaj, duke e akuzuar atë për “shkelje të rëndë të Kushtetutës”, pas vendimit për caktimin e datës së zgjedhjeve të pjesshme në Tiranë.
Në mbledhjen e Grupit Parlamentar të PD-së, u theksua se vendimi i Presidentit për të dekretuar zgjedhjet pa konsultim të gjerë politik dhe institucional, përbën një precedent të rrezikshëm dhe cenon parimet e balancës së pushteteve. Deputetët demokratë argumentuan se veprimi i Kreut të Shtetit është në kundërshtim me frymën e Kushtetutës dhe me nenet që rregullojnë kompetencat presidenciale në raport me proceset zgjedhore.
“Presidenti i Republikës, në mënyrë të paprecedentë, është rreshtuar në një anë të konfliktit politik, duke u bërë pjesë e skenarit të mazhorancës për të mbajtur nën kontroll institucionet dhe për të manipuluar kalendarin elektoral”, thuhet në deklaratën e Grupit Parlamentar të PD-së.