Gjatë një konflikti verbal dhe fizik mes dy personave, shtetasi Flamur Karaj, efektiv i FNSH, qëlloi me armë zjarri në kokë paraditen e sotme kushëririn e tij Enver Karajn.
Pas kësaj autori, i cili ishte edhe punonjës policie i Forcave të Ndërhyrjes së Shpejtë, është vetëdorëzuar në polici.
Policia ndërkohë ka njoftuar se ka arrestuar 58 vjeçarin nën akuzën e veprës penale, ‘Vrasja me dashje’, e mbetur në tentativë .
Ndërkohë mësohet se i plagosuri është në gjëndje kritike për jetën.
Njoftimi i Policisë:
Tiranë
Specialistët e Sektorit të Krimeve Ndaj Jetës në D.V.P Tiranë, në bashkëpunim Komisariatin e Policisë Nr 6 dhe me Specialistët e Drejtorisë Rajonale të SH.Ç.B.A Tiranë kanë bërë arrestimin në flagrancë të shtetasit: F.K., 58 vjeç, lindur në fshatin Dorëz, njësia administrative Pezë dhe banues në Tiranë, me detyrë punonjës policie në repartin e FNSH Tiranë
Arrestimi i tij u bë pasi shtetasi F.K, duke punuar në banesën e tij të vjetër, në fshatin Dorëz dhe pas një konflikti verbal dhe fizik me shtetasin E. K., me armën e shërbimit ka qëlluar në kokë shtetasin E. K., i cili është dërguar me urgjencë në SUT –Tiranë, dhe ndodhet në gjendje të rëndë shëndetësore.
Menjëherë pas ngjarjes, punonjësi i policisë F. K. është vetë dorëzuar pranë repartit të FNSH Tiranë, ku edhe shërbente.
Në cilësinë e provës materiale është sekuestruar një arme zjarri pistoletë, së bashku me karikatorin me 12 fishekë.
Materialet e administruara deri në këtë fazë të hetimeve, do ti kalohen Prokurorisë së Rrethit Gjyqësore Tiranë, për hetime të më tejshme në ngarkim të shtetasit F. K., për veprën penale, “Vrasja me dashje”, e ngelur në tentative.