Kandidatja e Partisë Socialiste për Bashkinë e Tiranës, Ogerta Manastirliu ka vijuar turin e takimeve me komunitetin për Tiranën 2030, me një bashkëbisedim me gra e vajza sipërmarrëse të Njësisë 3. Pasi dëgjoi shqetësimet që u ngritën në lidhje me zhvillimin e hapësirave të çliruara, Manastirliu foli për programin e Rilindjes Urbane 2.0, që synon riorganizimin dhe harmonizimin e hapësirave të përbashkëta, duke i shërbyer komunitetit, por edhe duke ngritur vlerën e biznesit.
“Sot, ne kemi më shumë se 1000 hapësira që janë çliruar në rrugët kryesore, por edhe në lagje, që janë 1000 mundësi për të realizuar qëllimin e përbashkët të komuniteteve, qoftë atë të banorëve, qoftë atë të biznesit.
Si realizohet kjo? Edhe në hapësira shumë të vogla, arkitektët janë duke punuar dhe po bëjnë projekte, që i vlejnë banorëve të zonës”, tha Manastirliu, duke shtuar se “kati 0” është një hapësirë që u shërben të gjithëve, ku njerëzit takohen dhe komunikojnë me njëri-tjetrin. Ajo vuri theksin në rëndësinë që ka harmonizimi i nevojave të komunitetit me ato të biznesit dhe bashkëjetesën e tyre në këto hapësira të përbashkëta.
“Ne kemi nevojë për t’i rijetësuar këto zona për t’ia kthyer komunitetit, por dhe për t’i dhënë vlerë edhe biznesit. Nga ana tjetër ne jemi duke finalizuar një rregullore, e cila do të vendosë për herë të parë standardet e ofrimit të shërbimit të biznesit, sidomos për bar-kafetë, por edhe për shërbime të tjera. Kjo rregullore do të vendosë standarde të shfrytëzimit të hapësirave të përbashkëta, të faktit që si sipërmarrja do të kontribuojë në rritjen e gjelbërimit të zonës”, tha Manastirliu.
Në këtë takim kandidatja e PS për Bashkinë e Tiranës, Ogerta Manastirliu shoqërohej nga Ministrja e Ekonomisë dhe Inovacionit, deputetja Delina Ibrahimi, por edhe nga të deleguarat Klotilda Bushka dhe Ermonela Felaj.