Presidenti amerikan Donald Trump ka paralajmëruar se do të rrisë me 10% tarifat ndaj mallrave të importuara nga Kanadaja, pas transmetimit të një reklame anti-tarifore nga provinca e Ontarios, në të cilën përfshihej edhe ish-presidenti amerikan Ronald Reagan.
Duke e cilësuar reklamën si një “mashtrim”, Trump akuzoi zyrtarët kanadezë për mosheqjen e saj përpara kampionatit botëror të bejsbollit, duke e konsideruar veprimin si provokues në një moment të ndjeshëm të marrëdhënieve tregtare mes dy vendeve.
Kryeministri kanadez Mark Carney reagoi duke thënë se Kanadaja mbetet e përkushtuar për të “vazhduar ndërtimin mbi progresin e bërë” në negociatat tregtare me SHBA-në, por shtoi se po thellon marrëdhëniet ekonomike me partnerë të tjerë ndërkombëtarë.
Aktualisht, SHBA-të kanë vendosur një taksë 35% për mallrat kanadeze, megjithëse shumë produkte përjashtohen në kuadër të marrëveshjes së tregtisë së lirë midis dy vendeve. Përveç kësaj, janë në fuqi edhe tarifa sektoriale, përfshirë 50% për metalet dhe 25% për automobilat.
Gjatë vizitës së tij në Azi, Trump deklaroi të shtunën se do të “rrisë tarifat ndaj Kanadasë me 10% mbi nivelin aktual”, duke theksuar se tarifat “paguhet nga kompanitë importuese amerikane, jo nga eksportuesit kanadezë”.
Tre të katërtat e eksporteve të Kanadasë shiten në tregun amerikan, ndërsa Ontario mbetet qendra kryesore e industrisë së automobilave në vend.
Në samitin e Shoqatës së Kombeve të Azisë Juglindore (ASEAN), ku morën pjesë si Trump ashtu edhe Carney, kryeministri kanadez u pyet për kërcënimet e reja tarifore dhe u shpreh i gatshëm për të vazhduar diskutimet me një nga partnerët më të rëndësishëm tregtarë të Kanadasë.
“Ne kemi një fokus të vazhdueshëm në arritjen e marrëveshjes më të mirë të mundshme për punëtorët dhe familjet kanadeze,” theksoi Carney.