Kreu i SPAK-ut, Altin Dumani vijon që të raportojë në Kuvend punën e Prokurorisë së Posaçme gjatë vitit 2024. Gjatë fjalës së Dumanit teksa po u përgjigjej pyetjeve të deputetëve, ka ndërhyrë ish-kryeministri Sali Berisha. Kryedemokrati u ngrit nga vendi duke kërkuar që Dumani të lexojë pyetjet një për një në mënyrë që t’u përgjigjjet më pas atyre.
Nga ana tjetër, reagimit të Berishës i është përgjigjur kryeparlamentari Niko Peleshi, i cili ka kërkuar vijimin e seancës normalisht. Më pas Dumani lexoi pyetjet e deputetit demokrat Luçiano Boçi, mes të cilave ai e pyet se përse kryeministri Edi Rama nuk është marrë nën hetim nga SPAK.
“Pse Edi Rama është shpallur i paprekshëm nga SPAK?”, ishte një prej pyetjeve të Boçit drejtuar Dumanit. Nga ana tjetër, Dumani iu përgjigj se aktualisht Prokuroria e Posaçme nuk e ka proceduar penalisht Edi Ramën, ku renditi edhe disa argumenta. “Nuk kemi nisur procedim penal ndaj Ramës”, tha mes të tjerash Dumani.