Ish-Zonja e Parë e Shteteve të Bashkuara të Amerikës, Michelle Obama, ka folur për jetën e saj në çift me Barack Obamën, duke treguar se pas më shumë se tri dekadash martesë, ata ende gjejnë mënyra për të mbajtur gjallë romantikën.
Në një intervistë për revistën “People”, Michelle tha se “gjëja më e rëndësishme në martesë është mënyra si e kalon kohën me partnerin”.
“Jemi të martuar prej 32, 33 vitesh… gjithmonë harroj. Kush po numëron më. Kur të dy jemi të lumtur për një dalje në mbrëmje, jemi mirë. Nuk vishemi shumë bukur, thjesht hamë një darkë të këndshme, ndezim qirinj, dëgjojmë muzikë dhe flasim”, u shpreh ajo me sinqeritet.
Michelle tregoi se tani daljet e tyre janë më të thjeshta, zakonisht për darkë në Washington, ndryshe nga koha kur jetonin në Shtëpinë e Bardhë.
“Në ato evente, çdo herë ishte si dasma jonë. Ndihesha si mbretëresha e mbrëmjes së maturës”, kujton ajo me humor.
Ajo shtoi se gjithmonë kishte kujdes të vishej bukur për bashkëshortin, duke e lënë ta shihte vetëm në momentin e fundit.
“Kishte një ritual të pathënë, ai nuk e dinte kurrë se çfarë kisha veshur derisa dola para tij. Është romanca, ato momente të vogla në këtë botë të çmendur”, tha Michelle Obama.
“Pas kësaj, ne zbrisnim shkallët dhe ishte sikur ‘thjesht qëndro në këtë moment’. Ishim vetëm ne dhe ishte e bukur”, përfundoi ajo.