Autoriteti i aviacionit amerikan ka vendosur të reduktojë me 10% lëvizjet ajrore në 40 aeroportet kryesore të SHBA-ve, për të garantuar sigurinë e fluturimeve, pas më shumë se një muaji mbylljeje të qeverisë që ka detyruar kontrollorët e trafikut ajror të punojnë pa pagesë.
Siç shkruan Corriere Della Sera, reduktimi do të hyjë në fuqi nga e premta, 7 nëntor, dhe rrezikon të shkaktojë shqetësime të paprecedenta pikërisht në fillim të fundjavës dhe pak kohë para nisjes së pushimeve dimërore.
Që nga mesi i tetorit, dhjetëra aeroporte në SHBA janë detyruar të kërkojnë ngadalësim të aktivitetit për shkak të mungesës së kontrollorëve të trafikut ajror dhe shkallës së lartë të mungesave për arsye shëndetësore, që të premten e kaluar arriti në 80% në qendrat e radarit që menaxhojnë trafikun ajror në zonën e New York-ut, një nga më të ngarkuarat në botë.
Vendimi është marrë nga Bryan Bedford, drejtuesi i Administratës Federale të Aviacionit (FAA), i cili theksoi nevojën për të ulur “presionin” mbi hapësirën ajrore amerikane.
Megjithatë, autoriteti nuk ka sqaruar ende se si do të realizohet reduktimi prej 10% i fluturimeve. Dihet vetëm se do të përfshihen 40 aeroportet kryesore të vendit, mes të cilëve janë edhe ato që përfaqësojnë portat hyrëse për miliona turistë çdo vit, si aeroportet e New York-ut, Boston-it, Chicago-s, Washington-it, Miami-t, Atlanta-s, Dallas-it, Denver-it, Filadelfia-s, San Francisco-s, Seattle-it, Los Angeles-it dhe Las Vegas-it.